Það er hægt að ímynda sér áhættuminni staði – í jarðfræðilegum skilningi – á yfirborði jarðskorpunnar en Ísland. Og það er hægt að ímynda sér áhættuminni staði – í sama skilningi – en beinlínis ofan á flekamótunum sem kljúfa landið svo að segja í tvennt, ofan á möttulstróki sem stígur djúpt úr iðjum jarðar.
Hreyfingar á þessum flekaskilum hafa undanfarna daga skyggt á fréttir um að ýmist einn eða enginn hafi greinst með kórónuveiruna hér á landi þáliðinn sólarhring. Þótt jarðhræringar séu aldrei sérstakt fagnaðarefni þá hafa þær hrist hressilega upp í þeim hyldjúpa hamfarahugsunarhætti sem heltekið hefur íslenska þjóðarsál á veirutímanum undanfarið ár.
Til allrar mildi virðast vísindamenn á einu máli um að ekki séu miklar líkur á hamförum með tilheyrandi eyðileggingu og manntjóni í þeim hræringum sem nú standa yfir á Reykjanesi. Hins vegar hefur enginn vísindamaður útilokað neitt í þeim efnum og ef sjálfskipaðir faraldsfræðingar kæmust í návígi við þá mætti eflaust búa til krassandi fyrirsagnir og vekja ótta í þjóðarsálinni.
Við eigum tilveru okkar á þessu landi því að þakka að kynslóðirnar á undan okkur höfðu burði til að vega og meta áhættu sem hlutfall af ávinningi. Útgerð hefði til að mynda lagst af við Íslandsstrendur á fyrst ári ef menn hefðu kyrrsett alla báta þar til búið væri að tryggja að ekkert gæti komið fyrir. Jafnvel í dag eru þeir sjómenn sem hverju sinni leggja úr höfn í umtalsvert meiri áhættu að týna lífi en fólk sem dytti það í hug á morgun að æða um allan bæ grímulaust í óhóflegu návígi við bláókunnuga.
Lífið er lotterí, og ég tek þátt í því, sagði manngarmurinn hann Geiri og það er ekki bara hollt og gott, heldur beinlínis lífsnauðsynlegt að rifja þá speki upp annað veifið.
- Rétta leiðin er aldrei auðveld - 3. febrúar 2023
- Foreldramótin - 10. júlí 2021
- Veiði eða della - 30. júní 2021
