Í öngum sínum með sítt í vöngum

sdfdÍ helgarnesti dagsins er fjallað á vísindalegan máta um hártísku ofanverðs níunda áratugarins og sérstakur gaumur gefinn að hljómsveitinni Duran Duran í því tilliti.

Af MulletJunky.com:“This is a hard-core mullet page. MulletJunky was designed for the above-average mullet enthusiast. This is not intended for people who think mullets are funny in a „Ha-Ha“ way. To a true mullet connoisseur, the mullet is not viewed as just a haircut. It’s a phenomenon…a culture…a rare breed that can transform interest and curiosity into obsession.“ Lesendur eru beðnir um að skoða síðuna á eigin ábyrgð.

Öfugt við það sem menn halda er klipping ekki bara klipping. Frá öndverðu hefur sérstakur hópur manna litið á hárgreiðslu sína sem merki um það að mennirnir breytist en tíminn standi hugsanlega í stað. Að sjálfsögðu væri ansi djúpt í árinni tekið að ætla að allir þeir sem skarti klippingunni séu sama sinnis – en hins vegar geta lesendur sannmælst um að eitthvað annað og meira hljóti hreinlega að liggja að baki henni: svo framandi er hún okkur flestum. Sem einstaklingum ber okkur hins vegar öllum skylda til að virða þá einstaklinga sem láta duttlunga hártískunnar sem vind um eyru þjóta – þá sem neita að taka þátt í smánarlegu sjónarspili smáborgara sem láta makkann almennt flakka! Þessi hópur manna er samstíga í ósamræminu og slær þannig skjaldborg um menningarverðmæti sem full ástæða er til að ætla að hefðu annars horfið sjónum okkar án þess að nokkur fengi rönd við reist.

Múllettinn er nefnilega kominn til að vera!

Eðli máls samkvæmt eru mismunandi múllettar meira og minna tilbrigði við sama stef en hins vegar ber að líta til þess að sérhver þeirra er einstakur út frá fagurfræðilegum sjónarhóli. Hljómsveitin Duran Duran átti þannig ríkari þátt en aðrir í því að hefja hárgreiðsluna til vegs og virðingar á meðal alls þorra manna. Þannig er óhætt að fullyrða að sjaldan – jafnvel aldrei! – hafi þjóðarpúlsin slegið jafnsamtaka og þegar vinsældir þeirra og hártísku öðluðust hvað mestar vinsældir.

Sökum þessa voru allir sómakærir menn felmtri slegnir þegar hljómsveitin lét þau boð berast í gegnum íslensk handbendi sín að þeir kærðu sig ekki um upphitunarhljómsveit frá níunda áratuginum á fyrirhuguðum tónleikum þeirra í Egilshöll.

Að sjálfsögðu láta lesendur Deiglunnar þessi skilaboð hljómsveitarinnar sem vind um eyru þjóta – og byrja að safna í Múllet frá og með deginum í dag – og krefjast þess jafnframt að gildi níunda áratugarins verði í hávegum höfð á tónleikunum.

Annað væri hreinlega glæpur gegn tískunni.

Góða helgi.

————

*Framhjáskot höfundar: Áhugasamir lesendur helgarnestisins geta gallað sig upp af raunverulegum hárkollum frá níunda áratuginum á vefsíðunni www.mulletjunky.com/wigs. Að sama skapi er vefsíðan óþrjótandi uppspretta fyrir andnauða og fórnfúsa einstaklinga, sem geta fundið reiðinnar býsn af tillögum að framandi Duran Duran-hárgreiðslum fyrir tónleikana.

Latest posts by Halldór Benjamín Þorbergsson (see all)