Lafþunnur Þorlákur

sdfdÍ snemmbúnu Þorláksmessuhelgarnesti dagsins verða jólaglögg, kaupæði og mannfagnaðir gerðir að umtalsefni.

Hafið varan á í jólaglöggi — slysin gerast þegar menn eiga síst von á þeim. Þið tryggið ekki eftir á!

Eftir að hafa fylgst með jólaglögginni hjá Wernham-Hogg-pappírsfyrirtækinu í Slough virðast önnur jólaglögg og mannfagnaðir fölna í samanburði. Enda skyldi engan undra. Þannig eru vænissjúkir yfirmenn til allrar hamingju ekki á hverju strái og samstarfsmönnum kemur iðulega bærilega saman þegar þeir eru komnir í glas. Reyndar fullvel ef marka má nýlega könnun breskra fjölmiðla, en þeir greindu frá því að jólaglögg væru kjörlendur fyrir framhjáhald á milli samstarfsmanna.

Þótt því hafi ekki beinlínis verið gert skóna er fullljóst að samstarfsmenn virðast jafna út margra ára uppsafnaða gremju yfir því hver tók eiginlega heftarann eða kláraði síðustu Homblest-kexkökuna í einu allsherjar kynsvalli og er það vel.

Barn getið undir mistilteini?

Pistlahöfundur var felmtri sleginn yfir þessum fregnum, enda kollvarpa þær vísindalegum kenningum hans um að „konseptið“ jólaglögg sé eitt alsherjar samsæri kanilframleiðanda, enda ekki nokkur vinnandi vegur að drekka þennan viðbjóð — nema auðvitað til að fá samstarfsfólkið til að líta ögn skár út undir mistilteini.

En sumum er bara ekki við bjargandi.

Þó svo að vinnustaðarómans sé gömul saga ný er grunnhugmyndin að baki fréttinni áleitin. Þannig hlýtur hún að kalla á spurninguna hvort að allt geti vanist og hvort öllum geti líka vel við alla — svo lengi sem menn umgangast hvora aðra í nægilega ríkum mæli.

Þeirri spurningu verður til allrar hamingju ekki svarað í þessum stutta og jólalega pistli, heldur geta lesendur haft hana bak við eyrun yfir jólahátíðina og bryddað upp á spurningunni sem umræðuefni í stöðnuðum fjölskyldujólaboðum.

Efni þessa helgarnestis er á reiki. Það skal fúslega viðurkennt — lesendur eru þó vinsamlega beðnir um að taka viljann fyrir verkið og lesa áfam í anda jólanna.

Eða læra þeir kannski af biturri reynslu að vínberin eru súr?

Góða jólahelgi, börnin góð.

Latest posts by Halldór Benjamín Þorbergsson (see all)