Nýr armur Kolkrabbans

Í gær var greint frá því að Steinhólar ehf. hafi eignast yfir 90% hlutafjár í Skeljungi hf. og ætli að leysa til sín útistandandi hluti smærri hluthafa. Að Steinhólum ehf. standa Burðarás, fjárfestingafélag Hf. Eimskipafélagsins, Kaupþing-Búnaðarbanki hf. og Sjóvá-Almennar hf. Samtímis var greint frá því að Sjóvá-Almennar muni kaupa hlut Skeljungs í Flugleiðum hf. sem þýðir að eignarhlutur tryggingafélagsins í flugfélaginu fer úr 6,22% í 11,53%.

Þessi viðskipti vekja upp spurningar um hvort myndast hafi yfirtökuskylda í Flugleiðum á þeim grundvelli að samanlagður eignarhlutur Sjóvá-Almennra og Burðaráss mun fara yfir 40%. Félögin tvö hafa einmitt verið kennd við valdablokkina Kolkrabbann. A.m.k. er það ljóst að þótt Kolkrabbinn hafi misst frá sér einn arm, Skeljung hf., hefur annar armur komið í staðinn. Nýi armurinn er einfaldlega Flugleiðir en þar sitja Baugur, Kaupþing og tengd félög á fjórðungshlut á móti rúmum 40% hjá Kolkrabbanum sem tryggir honum öruggan meirihluta.

Sterk eignatengsl

Ef eignatengsl Sjóvá-Almennra og Burðaráss eru skoðuð þá kemur í ljós að fyrrnefnda félagið er næststærsti hluthafinn í Eimskipafélaginu með um 10% hlut. Núverandi stjórnarformaður Eimskipa er Benedikt Jóhannesson, náfrændi þeirra Benedikts og Einars Sveinssona er ráða ríkjum hjá Sjóvá. Einar situr sjálfur í stjórn Eimskipa. Benedikt Sveinsson var sjálfur lengi stjórnarformaður Eimskipa en starfar nú m.a. sem stjórnarformaður Sjóvá. Sjóvá hefur haft örugg tök á stjórn Eimskipa um nokkurt skeið. Þá á Eimskip sjálft um 6% hlutafjár í sjálfu sér. Talsmenn félagsins hafa gefið það út að þeir ætli að selja hlutinn og verður fróðlegt að sjá hvar hann endar.

Stærsti eigandinn í Sjóvá er Burðarás með 10,2% hlut en þann 30. júní sl. bætti félagið við sig 1,5% hlut í kjölfar þess að Haukþing ehf. var leyst upp. Þá á félagið sjálft um 12% í sjálfu sér og börn Sveins Benediktssonar um 13,5%. Bótasjóðir tryggingafélagsins eru gríðarlegir háir og gefa mikla möguleika á ýmiss konar fjárfestingum. Örlítil hækkun á ávöxtun bótasjóðanna á milli tímabila getur haft gríðarleg áhrif á rekstur tryggingarfélags á borð við Sjóvá. Þar af leiðandi er eftir miklu að slægjast.

Í deiglupistli þann 31. júlí sl. velti Þórður H. Þórarinsson því fyrir sér hvort Kaupþing-Búnaðarbanki hefði átt að gera öðrum hluthöfum í Skeljungi hf. yfirtökutilboð á grundvelli laga um verðbréfaviðskipti. Þar skrifaði hann m.a.:

Í lögum um verðbréfaviðskipti nr. 33 frá 20. mars 2003 segir að yfirtökuskylda myndist þegar einn aðili, eða tengdir aðilar, hefur eignast 40% atkvæðisréttar í félaginu.

Föstudaginn 25. júlí átti Kaupþing 39,63% hlutafjár og Skeljungur hf. átti 1,75% í sjálfu sér. Nú segir í lögum um hlutafélög, nr. 2 frá 30. janúar 1995, að eigin hlutir félags og hlutir, sem dótturfélag á í móðurfélagi, njóta ekki atkvæðisréttar. Í raun þýðir þetta að Kaupþing hafi farið með 39,63%/(100 – 1,75%) = 40,3% atkvæðisréttar í Skeljungi hf. þann 25. júlí síðastliðin og því spurning hvort ekki hafi myndast yfirtökuskylda samkvæmt lögum um verðbréfaviðskipti.

Yfirtökuskylda í Flugleiðum

Í tilviki Flugleiða hf. eiga Burðarás (28,69%) og Sjóvá-Almennar (11,53%) samtals 40,22%. Ef við drögum frá þau hlutabréf sem Flugleiðir eiga í sjálfu sér (6,77%) hækkar sú tala upp í 43,14%. Ætla mætti að þótt erfitt sé að skilgreina hvað séu tengdir aðilar eru sterkar líkur fyrir því að yfirtökuskylda hafi myndast í Flugleiðum – og það án þess að taka eigin bréf með í reikninginn. Þessi túlkun byggist á 32. gr. í lögum um verðbréfaviðskipti þar sem segir að yfirtökuskylda myndist þegar sá sem „ … hefur á grundvelli samnings við aðra hluthafa rétt til að ráða yfir sem nemur 40% atkvæða í félaginu.“

Lögspekingar eru ekki allir á eitt sáttir með hvernig túlka eigi þennan lagalið og verður ekki annað sagt en að lögin séu óskýr. Sumir myndu segja að lögin væru meingölluð. Það er væntanlega í verkahring Fjármálaeftirlitsins að skera úr um hvort Kolkrabbinn eigi að bjóða í önnur bréf í Flugleiðum.

Kolkrabbinn heldur velli

Mikið hefur verið fjallað um hvort Kolkrabbinn hafi veikst við það að Kaupþing gerði áhlaup á Skeljung með þeim afleiðingum að krabbinn missti tök sín á olíufélaginu. Sjóvá og Eimskip náðu verulegum gengishagnaði á sölu bréfanna og er talið að tryggingafélagið taki inn 900 milljóna kr. gengishagnað sem hefur mjög jákvæð áhrif á rekstur þessa árs. Eimskip er fremur skuldsett félag sem nýtur góðs af góðri sölu.

Í stað Skeljungs sem þriðja armsins í valdablokk Kolkrabbans koma Flugleiðir. Rekstur flugfélagsins stórbatnaði á síðasta ári og skilaði félagið frábærri afkomu. Félagið hefur mikla möguleika á að skila hluthöfum sínum góðri afkomu ef stjórnendur félagsins missa ekki tökin á rekstrinum eins og æði oft hefur gerst.

• About
• Latest Posts

Eggert Þór Aðalsteinsson

Latest posts by Eggert Þór Aðalsteinsson (see all)

• Íslenskir bankar og útlendingar - 22. júní 2021
• Hitnar í ofnunum - 21. apríl 2021
• Kynslóðaskipti í sjávarútvegi - 22. mars 2021