Reykingar gætu hentað þér

Kveiktu í sígarettu eða pípu og finndu hvernig hlýr reykurinn faðmar þig innanfrá og fyllir þig öryggi og sjálfstrausti. Þú vaknar betur og fyllist lífskrafti…

Frá og með deginum í dag er bannað að tala vel um tóbak. Þetta er miður því tóbak hefur marga góða kosti sem ekki eru öllum kunnir. Það er reyndar rétt að reykingar eru óhollar og geta valdið dauða og ýmsum fleiri óþægindum en tóbaksreykingar hafa oft hressandi áhrif til skamms tíma og ekki má heldur vanmeta félagslega kosti þeirra.

Sjálfur reyki ég ekki að staðaldri en finnst þó gaman að púa góða vindla eftir góða máltíð eða við skemmtileg tækifæri. Til dæmis hélt ég upp á aldamótin fyrir um hálfu ári síðan með alveg hreint frábærum Davidoff 2000 vindli sem ég mæli óhikað með. Hann var mjúkur og góður og ekki of sterkur og gæti jafnvel hentað þeim sem hafa hugsað sér að byrja að reykja vindla. Það er þó rétt að taka það fram að flestir byrjendur halda að smávindlar séu mildari en þeir stóru, almenna reglan er þó þveröfug. Þeir sem ætla að byrja að reykja á næstunni ættu því að ráðfæra sig við reyndari reykingamenn áður en hafist er handa.

Ég er ekki eins hrifinn af sígarettum, þrátt fyrir að þær fáist í alls kyns bragðtegundum og ýmsum styrkleikum, og reyki þær aldrei. Ég hef þó tekið eftir því að þeir sem reykja sígarettur eru með n.k. félagslega forgjöf. Þannig geta þeir sameinast um reykingarnar og bryddað upp á samræðum við bláókunnugt fólk án nokkurra vandræða. Hver þekkir t.d. ekki „áttu eld“ bragðið ódauðlega. Þeir sem ekki reykja eru oft grunaðir um græsku þegar þeim dettur í hug að ávarpa ókunnuga manneskju þegar engin sýnileg ástæða er til staðar. Þannig ættu allir, að mínu mati, sem eru á einhvern hátt óframfærnir eða feimnir að íhuga alvarlega að byrja að reykja eða reykja meira opinberlega.

Lyktin af góðu píputóbaki þykir mér góð og finnst miður að ekki séu fleiri pípureykingamenn á Íslandi. Eins eru pípur oft fallegir skrautmunir og geta á sett svip á manneskju, á svipaðan hátt og gleraugu, úr eða eyrnalokkar. Sem dæmi má nefna Sherlock Holmes, en sögur um hann eru ein ástæða þess að pípureykingamenn þykja greindarlegir. Reyndar má í því sambandi ekki gleyma því að nikótín hefur örvandi áhrif og eykur því virkni heilastarfseminnar. Mig hefur alltaf langað svolítið til að reykja pípu og finnst alltaf gaman að vera innan um pípureykingamenn. Píputóbakið er þó of sterkt fyrir minn smekk til að reykja það beint og því kýs ég heldur óbeinar pípureykingar.

Að lokum vil ég benda á hið hróplega óréttlæti sem reykingamenn búa við. Þeir borga fyrir ræktun tóbakslaufanna, framreiðslu þess í neytendapakkningar, kostnað við flutning þess til landsins auk þóknunar til dreifingar- og umboðsaðila og óhóflegra opinberra gjalda. Á meðan þurfa þeir sem njóta óbeinna reikinga ekki að borga eina einustu krónu fyrir vikið.

Latest posts by Brynjólfur Ægir Sævarsson (see all)