Sögur af Brennivíns Binga og öðrum flottum gæjum og pæjum

Á þeim dögum er Ólafur F. Magnússon komst í borgarstjórastól Reykjavíkurskíris með hjálp Vilta Tryllta Villa ríkti skálmöld á strætum og torgum skírisins. Vaskir sveinar í flottum fötum vopnaðir heilu hnífasettunum gengu um götur og torg og reyndu að punga út kaupréttarsamninga fyrir vini og vandamenn. Já Ólafi fyrsta Magnússyni var vandi að höndum.

Þeir er höfðu sig mest í frammi á þessum víðsjárverðu tímum voru þeir Brennivíns Bingi og Gaui Kuti. Brennivíns Bingi hafði hlotið viðurnefni sitt fyrir að skenkja ungmennum brennivín í kosningamiðstöð sinni í ótakmörkuðu mæli. Hann var jafnframt þekktur fyrir að tárast í hvert skipti sem hann birtist í sjónvarpi og leggja bílum í stæði fatlaðra út um allan bæ. Gaui Kuti hafði hlotið viðurnefni sitt fyrir að ganga oft og iðulega um með heilt hnífasett í bakinu er fróðir menn töldu keypt í IKEA eða Epal. Hann hafði einnig getið sér gott orð fyrir skriftir og gegnum tíðina sent þúsundum manna trúnaðarbréf.

Vinslit höfðu orðið milli Brennivíns Binga og Gaua Kuta sem olli miklum titringi í röðum manna og kvenna er kenndu sig við Framsókn. Að lokum fór svo að Gaui Kuti var búinn að negla svo mörgum IKEA hnífasettum í bakið á Brennivíns Binga að Framsóknarflokkurinn hafði ekki efni á að kaupa fleiri jakkaföt handa honum. Hætti Brennivíns Bingi stærilátum í stjórnmálum í kjölfarið.

Brennivíns Bingi hafði verið í fylkingu nokkurra kynlegra kvista er gerði þau plön að láta tollheimtumenn og farisea ganga hús úr húsi í Reykjavíkurskíri og krefjast hærri fasteignagjalda. Fremstur í þeirra flokki fór hinn hárprúði og fríði Dagur Bje Eggertsson er talaði í gátum og bjó yfir alls konar orðum og setningum sem enginn skyldi nema hann sjálfur. Hann var þekktur fyrir lækningarmátt sinn, standa fyrir skrílslátum í húsakynnum borgarstjórnar og hæfileika til að stofna þverfaglegar sérfræðinefndir sem áttu að takast á við pólitík hins daglega lífs í Nýju Reykjavík. Stundum lét hann jafnvel nefndirnar notast við veraldarvefinn, hraðbraut upplýsingasamfélags 21. aldar.

Í liði með þeim Brennivíns Binga og Degi Bje var kvennskörungur mikill að nafni Svandís. Svandís var fræg fyrir að hafa allt á hornum sér og tala mikið. Hennar helsti galli var að þegar hún komst í þá stöðu að geta gert eitthvað í málunum sem hún hafði talað hvað mest um áður gerði hún lítið sem ekkert. Hún var jafnframt fræg fyrir að dýrka og dá gamla og ljóta kofa í miðbæ Reykjavíkurskíris.

Aðalóvinur Brennivíns Binga, Dags Bje og Svandísar var Villti Tryllti Villi. Villti Tryllti Villi var landsfrægur fyrir að klæða sig upp í alls konar búninga og spóka sig í miðju Reykjavíkurskíri. Oftar en ekki slökkviliðsbúninga. Vakti þetta mikla kátínu íbúa skírisins. Í hvert skipti sem Villti Tryllti Villi tók sig til og íklæddist þessum klæðum fögnuðu borgarbúar með því að svolgra í sig volgum bjór.

Ekki hefur Flugufætinum borist fregnir af því hvernig Ólafi fyrsta Magnússyni tókst til í glímu sinni við ólátabelgina í skírinu. Hins vegar hefur fætinum borist þær fregnir í telefaxi að Ólafur fari fyrir fríðum flokki fola og fegurðadísa sem ævinlega standi þétt saman í blíðu og stríðu.

P.S. Það er ekkert betra en að sjá andstæðinginn lúta í gras og væla.